Kailan kaya magiging totoo ang isang panaginip?
Kailan ko kaya maihahayag yaring aking pag-ibig?

Mga likhang ala-alang nagpapangiti’t nangingiliti,
Kailan kaya matutupad? Kailan kaya mangyayari?

Akin kayang ibulong sa hangin, iyo kayang maririnig?
Mababasa mo ba’ng aking puso kung isusulat ko sa tubig?

Magpalipad kaya ako ng saranggola bitbit yaring pag-ibig;
Makikita mo kaya ang puso ko sa asul na himpapawid?

Magsulat kaya ako ng kanta at iparinig sa mundo;
Aabot naman kaya ang himig ko diyan sa iyong puso?

O gumawa ako ng liham at ipadala sa anghel;
Mababasa mo kaya ang awit ng puso ko sa papel?

Pa’no ko kaya ipipinta’t paghahaluin ang mga kulay?
Mailalarawan ba nito na ikaw na ang aking buhay?

Hindi na makapag-isip ang utak kong naging hugis-puso.
Palagi na lang ikaw ang inaawit ng ala-ala ko.

Sa paano kayang paraan malalaman mo ang lihim ko
Na ikaw ang kaligayahan at bumubuo ng mundo ko?

Basta…susundin ko ang puso ko’t magtitiwala sa Itaas,
At nawa’y malaman’t maramdaman mo ang pag-ibig kong wagas.

This work, unless otherwise expressly stated, is licensed under a Creative Commons Attribution-Noncommercial-No Derivative Works 3.0 Philippines License.

(+2 rating, 2 votes)

 

July 20th, 2010 by andoyman gusto ko lang gumawa ng komiks. may blog pala ako http://andoyman.i.ph yey! asteg!